БІЛІМ БЕРУДЕ РОБОТОТЕХНИКАНЫ ҚОЛДАНУ: ОҚУШЫЛАР ҮШІН ЖАҢА МҮМКІНДІКТЕР

Мақалада технологиялық экономикаға көшу жағдайында білім беру робототехникасының Қазақстан Республикасындағы орта білім беру жүйесін трансформациялаудағы рөлі қарастырылады. Зерттеудің мақсаты — халықаралық инженерлік FIRST Tech Challenge (FTC) бағдарламасының білім алушылардың кəсіби құзыреттерін қалыптастыруға ықпалын кешенді талдау жəне оны ұлттық білім беру ортасына интеграциялау жолдарын айқындау. Зерттеудің негізгі нысаны — 7–11-сынып оқушыларына (12–18 жас) арналған жарыстық платформа ретінде қарастырылатын FTC бағдарламасы. Ол роботтарды жобалаудан бастап құрастыру мен бағдарламалауға дейінгі толық кəсіби инженерлік циклді тиімді модельдейді. Зерттеудің əдіснамалық негізін нормативтік-құқықтық базаны (соның ішінде «Цифрлық Қазақстан» мемлекеттік бағдарламасы мен МЖМБС-2022) жүйелі талдау, қазіргі педагогикалық зерттеулерге салыстырмалы контент-талдау жүргізу, халықаралық тəжірибені зерделеу, сондай-ақ соңғы жылдардағы қазақстандық командалардың FTC турнирлеріне қатысу нəтижелерін сандық жəне сапалық талдау құрады. Алынған нəтижелер FTC бағдарламасының білім беру əлеуетін сипаттауға жəне бағдарлама талаптарының инженерлік, командалық жəне коммуникативтік дағдыларды дамытуға қалай ықпал ететінін көрсетуге мүмкіндік береді. Авторлар сондай-ақ бағдарламаны Қазақстанда кеңінен енгізу жолындағы негізгі кедергілерді анықтады. Олардың қатарында білікті педагог кадрлардың тапшылығы, жабдықтардың жоғары құны жəне өңірлердегі инфрақұрылымға қолжетімділіктің біркелкі болмауы бар. Аталған мəселелерді шешу үшін мұғалімдердің біліктілігін арттыруға арналған мамандандырылған курстар əзірлеу жəне мектеп зертханаларын жаңғыртуға бағытталған мемлекеттік-жекеменшік əріптестік тетіктерін енгізуді қоса алғанда, ғылыми негізделген ұсыныстар берілді.