«Ұстаз» ұлттық платформасының жұмысының артында не тұр?

«Өрлеу» ҰБАО» АҚ-ның «Ұстаз» ұлттық платформасы – педагогтердің кәсіби дамуы мен аттестаттау үдерістерін сүйемелдеуді қамтамасыз ететін негізгі цифрлық жобалардың бірі.

Ақпараттық жүйелерді әкімшілендіру департаментінің директоры Камила Айтқожинаның айтуынша, пайдаланушыларға арналған интерфейстің артында мамандардың күн сайынғы үйлесімді еңбегін талап ететін күрделі цифрлық экожүйе жұмыс істейді.

Департамент командасы платформаның үздіксіз жұмысын қамтамасыз етіп қана қоймай, оның функционалын тұрақты түрде дамытып келеді: жаңа сервистерді жобалайды, жаңартуларды енгізеді, қолданыстағы құралдарды жетілдіреді және жүйенің өнімділігін арттырады.

Сондай-ақ платформаны мемлекеттік ақпараттық жүйелермен интеграциялауға, серверлік инфрақұрылымды дамытуға, ақпараттық қауіпсіздікті қамтамасыз етуге және педагогтер мен аттестаттау комиссияларына жедел техникалық қолдау көрсетуге ерекше назар аударылады.

Бүгінде «Ұстаз» – педагогтердің кәсіби дамуының маңызды үдерістерін біріктіретін біртұтас цифрлық орта. Команданың басты мақсаты – платформаны одан әрі сенімді, ыңғайлы әрі технологиялық тұрғыдан жетілдіріп, әрбір жаңа сервистің пайдаланушылардың жұмысын шын мәнінде жеңілдетуін қамтамасыз ету.

«Әрбір жаңартудың, жаңа функцияның және сәтті шешілген өтініштің артында үлкен команданың күнделікті еңбегі жатыр. Біз білім беру жүйесінің дамуына ықпал ететін технологияларды жасаймыз», – деп атап өтті «Өрлеу» ҰБАО» АҚ Ақпараттық жүйелерді әкімшілендіру департаментінің директоры Камила Айтқожина.