ҚАЗАҚ ТІЛІ МЕН ӘДЕБИЕТІ МҰҒАЛІМДЕРІН ДАЯРЛАУДЫҢ ЖАҢА БАҒЫТТАРЫ ТАЛҚЫЛАНДЫ

М. Мәметова атындағы Қызылорда педагогикалық жоғары колледжінде қазақ тілі мен әдебиеті мұғалімдерін даярлаудың білім беру мазмұнын жаңарту және инклюзивті білім беруді дамыту мәселелеріне арналған республикалық форсайт-сессия өтті.

Іс-шараға жұмыс беруші ұйымдардың өкілдері, психологиялық-медициналық-педагогикалық консультация (ПМПК) және психологиялық-педагогикалық түзету кабинеттерінің (ППТК) мамандары, жоғары оқу орындарының өкілдері, республика көлеміндегі техникалық және кәсіптік білім беру ұйымдарының басшылары мен оқытушылары, сондай-ақ мектеп мұғалімдері қатысты.

Форсайт-сессия аясында «Өрлеу» біліктілікті арттыру ұлттық орталығының Қызылорда облысы бойынша Кәсіби даму институтының кафедра меңгерушісі, филология ғылымдарының кандидаты Жанар Исаева «Қазақ тілі мен әдебиеті мұғалімдерін даярлаудағы білім беру мазмұны: бүгінгі талап және болашақ бағдар» тақырыбында баяндама жасады.

Баяндама барысында қазақ тілі мен әдебиеті мұғалімдерінің кәсіби құзыреттілігін дамыту, біліктілігін арттырудың басым бағыттары, үздіксіз кәсіби білім берудің жаңа талаптары мен оларды тәжірибеде жүзеге асыру жолдары қарастырылды. Сонымен қатар білім беру мазмұнын заман талабына сай жетілдіру және болашақ педагогтерді кәсіби қызметке сапалы даярлау мәселелеріне назар аударылды.

Сессия қорытындысы бойынша әріптестермен бірлескен талқылау нәтижесінде кәсіптік модульдер мен оқыту нәтижелерінің мазмұнын жетілдіруге бағытталған ұсыныстар әзірленді.

Форсайт-сессия білім беру мазмұнын жаңарту, педагогтерді даярлау сапасын арттыру және инклюзивті білім беру тәжірибесін жетілдіру бағытындағы өзекті мәселелерді талқылауға мүмкіндік беріп, кәсіби ынтымақтастықты нығайтумен қорытындыланды.