«Адал азамат»: құндылықтан — күнделікті әрекетке

Мемлекет басшысы Қасым-Жомарт Тоқаевтың «Әділетті Қазақстанды Адал азаматтар құрады» деген ұстанымы білім мен тәрбие саласына да нақты бағыт береді.

Президент атап өткендей, адалдық, жауапкершілік, еңбекқорлық, білімпаздық, отаншылдық, заң мен тәртіпке құрмет жаңа қоғамдық этиканың негізіне айналуға тиіс.

Осы бағытта «Өрлеу» БАҰО» АҚ Астана қаласы бойынша Кәсіби даму институтында «Адал азамат» бағдарламасының құндылықтарын педагогикалық ортаға енгізуге ерекше мән беріліп отыр.

Ұстаздар үйі бағдарламаның бірыңғай визуалды стиліне сай безендірілген. Кеңістікте Конституция қағидаттары, заң мен тәртіп, «Таза Қазақстан» ұлттық бастамасының идеялары көрініс тапқан.

«Оқу және кәсіби даму кабинетінде» кітап алмасу бұрышы ашылған. Сондай-ақ үзіліс кезінде шахмат пен тоғызқұмалақ ойнап, ой сергітуге жағдай қарастырылған.

Бұл бағыттағы жұмыс оқу кеңістігімен шектелмейді. Институтта ашық дәрістер, диалог алаңдары, зиялы қауым өкілдерімен кездесулер ұйымдастыру көзделген. Сондай-ақ Әкелер одағы, Аналар кеңесі секілді қоғамдық ұйымдармен бірлесіп, ұрпақ тәрбиесіне арналған кездесулер өткізу жоспарланып отыр.

Бүгінде Астана филиалында «Адал азамат» құндылықтарын дәріптейтін осындай білім беру және тәрбие инфрақұрылымы қалыптастырылып жатыр. Алдағы мақсат — осы тәжірибені «Өрлеудің» басқа да өңірлік филиалдарына таратып, олардың инфрақұрылымын да осы бағытта кезең-кезеңімен дамыту.