Жасанды интеллект — білім сапасын арттырудың жаңа мүмкіндігі

«Өрлеу Ақмола» біліктілікті арттыру институтының курстарынан өткен тарих пәнінің мұғалімі Сарсембай Арапов «Көкше» телеарнасындағы «Пәрменді пікір» бағдарламасына қатысып, Президент Жолдауындағы бастамаларды жан-жақты қолдады. Тікелей эфир барысында ол жасанды интеллектті оқу үрдісіне енгізу білім беру сапасын сапалы жаңа деңгейге көтеруге жол ашатынын ерекше атап өтті. Педагог заманауи технологиялардың оқушылардың пәнге деген қызығушылығын арттырып қана қоймай, мұғалімдердің күнделікті жұмысын жеңілдетуге де зор септігін тигізетінін жеткізді.

Оның айтуынша, тарих сабақтарында цифрлық платформалар мен жасанды интеллект құралдарын қолдану арқылы өткен дәуір оқиғаларын интерактивті түрде көрсетуге, оқушылардың сыни ойлау қабілетін дамытуға болады. Мұндай тәсілдер білім беру үдерісін әрбір оқушының жеке ерекшеліктеріне бейімдеп, сапалы нәтижеге қол жеткізуге мүмкіндік береді.

Бұл бастама Мемлекет басшысының ел болашағы үшін айқындаған стратегиялық бағыттарына толықтай сай келеді. Заман талабына сай жаңашыл қадамдар жасап жүрген ұстаздардың белсенділігі өңірдегі білім беру жүйесін жетілдіруге және жас ұрпаққа сапалы тәрбие мен саналы білім беру ісіне айтарлықтай үлес қоса беретіні анық.