КІТАП ОҚУ МӘДЕНИЕТІН ДАМЫТУ: «ӨРЛЕУ» МЕН «КІТАП ОҚИТЫН ҰЛТ» ЖОБАЛЫҚ КЕҢСЕСІ ЫНТЫМАҚТАСТЫҚ ТУРАЛЫ МЕМОРАНДУМҒА ҚОЛ ҚОЙДЫ

Астанада өскелең ұрпақтың кітап оқуға деген қызығушылығын арттыру, оқу сауаттылығын дамыту және қоғамда тұрақты оқу мәдениетін қалыптастыру бағытында маңызды қадам жасалды. «Кітап оқитын ұлт» жобасы аясында «Өрлеу» біліктілікті арттыру ұлттық орталығының Астана қаласы бойынша Кәсіби даму институты мен Астана қаласындағы «Кітап оқитын ұлт» жобалық кеңсесі арасында өзара ынтымақтастық туралы меморандумға қол қойылды.

Құжатқа «Кітап оқитын ұлт» жобалық кеңсесінің жетекшісі Жақсыбай Боранбаев пен «Өрлеу»  біліктілікті арттыру ұлттық орталығының Астана қаласы бойынша Кәсіби даму институтының директоры Ерлан Қалмақов қол қойды.

Меморандум тараптардың кәсіби тәжірибесі мен шығармашылық жетістіктерін біріктіріп, елордада оқу мәдениетін жүйелі дамытуға, педагогтердің озық тәжірибесін таратуға және «Кітап оқитын ұлт» бастамасын білім беру ұйымдарында тиімді жүзеге асыруға арналған.

Меморандумның негізгі мақсаты  әдебиетті кеңінен насихаттау, білім беру ұйымдарында оқушылардың оқу сауаттылығын арттыру және педагогтерді оқу мәдениетін қалыптастыру үдерісіне белсенді тарту. Ынтымақтастық аясында білім беру мекемелеріне арналған бірлескен инновациялық жобалар мен әдістемелік кейстер әзірлеу, мұғалімдер мен мектеп кітапханашыларына арналған семинарлар мен практикумдар ұйымдастыру, сондай-ақ балалар мен жастар арасында кітап оқуды насихаттайтын ақпараттық-ағартушылық іс-шаралар өткізу жоспарланып отыр.

Бірлескен жұмыстың алғашқы бастамаларының бірі ретінде Астана қаласында педагогтер арасында үздік әдістемелік әзірлемелер байқауын өткізу ұсынылды. Байқау аясында мұғалімдер оқушылардың кітап оқуға қызығушылығын арттыруға бағытталған тиімді тәжірибелерімен және авторлық әдістерімен бөлісті. Үздік жұмыстарды одан әрі жетілдіріп, елорданың білім беру жүйесінде қолдану көзделіп отыр.

Бұл бастамалар республикалық «Кітап оқитын ұлт» марафонының мақсаттарымен де үндеседі. Марафон қатысушылары 15 кітап оқып, әр шығарма бойынша өз пікірлерін білдіруі тиіс. Алайда жобаның басты мақсаты  белгіленген кітап санын оқумен шектелмей, балалардың бойында одан әрі жалғасатын оқу дағдысын қалыптастыру.