ЖИ ДӘУІРІНДЕГІ МЕКТЕП МӘДЕНИЕТІ: ӨЗЕКТІ МӘСЕЛЕЛЕР МЕН ОРТАҚ ШЕШІМДЕР

«Өрлеу» Қызылорда облысы бойынша Кәсіби даму институтының ұйымдастыруымен «Жасанды интеллект дәуіріндегі мектеп мәдениеті: мұғалімнің әл-ауқаты мен этикалық жауапкершілік теңгерімі» тақырыбында республикалық ғылыми-тәжірибелік онлайн конференция өтті.

Конференция жұмысына өңірлік жоғары оқу орындарының, «Өрлеу» БАҰО» АҚ филиалдарының профессорлық-оқытушылық құрамы, техникалық және кәсіптік, жалпы орта және қосымша білім беру ұйымдарының педагогтері қатысты.

Конференция жұмысында жасанды интеллектінің мектеп мәдениетіне ықпалы, педагог пен білім алушы арасындағы коммуникацияның өзгеруі, цифрлық ортадағы мұғалімнің кәсіби және психологиялық әл-ауқаты, ЖИ құралдарын қолдану кезіндегі академиялық адалдық, дербес деректердің қауіпсіздігі, ЖИ ұсынған ақпараттың дұрыстығын бағалау және оны педагогикалық тұрғыдан пайдалану мәселелері көтерілді.

Конференция тыңдалымына қатысушылар мектепті басқару мен білім беру үдерісіндегі цифрлық трансформацияны, ЖИ құралдарының педагогтің күнделікті жұмысын жеңілдетудегі мүмкіндіктерін, оларды қолданудың этикалық және құқықтық шекараларын, сондай-ақ сабақ үдерісіне тиімді кіріктірудің практикалық тәжірибелерін ортаға салды.

Конференция қорытындысы бойынша бірқатар ұсыныстар айтылды. Атап айтқанда,

– ЖИ-ді педагогті алмастыратын емес, оның кәсіби қызметін қолдайтын көмекші құрал ретінде пайдалану;

– педагогтердің ЖИ сауаттылығы мен цифрлық құзыреттілігін жүйелі жетілдіру;

– білім алушылар арасында академиялық адалдық мәдениетін қалыптастыру;

– дербес деректерді қорғау талаптарын сақтау;

– ЖИ жасаған контентті міндетті түрде педагогикалық және сыни сараптаудан өткізу;

– мұғалімнің уақытын үнемдейтін тиімді ЖИ тәжірибелерін жинақтап, педагогикалық қауымдастық арасында тарату қажеттігі атап өтілді.

Сонымен қатар педагогтің цифрлық ортадағы кәсіби әл-ауқатын қолдау, технологиялық өзгерістерден туындайтын жүктемені азайту және ЖИ құралдарын оқу мақсатына сай, қауіпсіз әрі жауапты қолдануға бағытталған әдістемелік қолдауды күшейту ұсынылды.

Конференция білім беру саласындағы жасанды интеллект мәселесін тек технологиялық мүмкіндік ретінде емес, мектеп мәдениеті, педагогтің әл-ауқаты, академиялық адалдық және кәсіби жауапкершілікпен өзара сабақтастықта қарастыру қажеттігін көрсетті.