Қазіргі мектепте тәлімгерлікті ұйымдастыру дегеніміз не?

Қазіргі білім беру жүйесінде педагогтердің кәсіби әлеуетін арттыру, жас мамандардың кәсіби қалыптасуына қолдау көрсету және педагогикалық тәжірибе алмасу мәдениетін дамыту – өзекті міндеттердің бірі. Осы бағытта «Өрлеу» БАҰО» АҚ Түркістан облысы бойынша кәсіби даму институтында 27 қазан мен 6 қараша аралығында біліктілікті арттыру курс өтуде. «Қазіргі мектепте тәлімгерлікті ұйымдастыру» тақырыбындағы орта білім беру ұйымдарының педагогтеріне арналған курстың жетекшісі – Салтанат Жолшыбекова.                                 

 

Оқу барысында тыңдаушылар тәлімгерліктің нормативтік-құқықтық және теориялық негіздерін зерделеп, мектеп жағдайында тәлімгерлік үдерісті тиімді ұйымдастырудың заманауи тәсілдерін меңгеруде. Атап айтқанда, тәлімгер мен тәлім алушы арасындағы кәсіби ынтымақтастықты қалыптастыру, жас педагогті қолдаудың тиімді жолдары, тәлімгерліктің жеке, көлденең және командалық модельдерін қолдану, кәсіби рефлексия мен тәжірибе алмасу мәселелеріне басымдық берілуде. Тәжірибелік жұмыстар, топтық талқылаулар мен тәжірибеге бағытталған тапсырмалар арқылы тыңдаушылар тәлімгерлік қызметті ұйымдастыру дағдыларын жетілдіріп, оны білім беру ұйымының тәжірибесіне енгізу жолдарын қарастыруда.

 

Курстың мақсаты – заманауи мектепте тәлімгерлік процесін тиімді ұйымдастыру үшін тәлімгерлердің кәсіби құзыреттіліктерін жетілдіру. Тәлімгерлік – тәжірибені жеткізу ғана емес, кәсіби дамуға жол ашу, әріптестік қолдау көрсету және білім сапасын арттыруға бағытталған ортақ жауапкершілік.