ПРЕЗИДЕНТ ЖОЛДАУЫ: БІЛІМ САПАСЫ МЕН ҰСТАЗ МӘРТЕБЕСІНЕ ЕРЕКШЕ НАЗАР

Мемлекет басшысы Қасым-Жомарт Тоқаевтың «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауында еліміздің алдағы даму бағыттары айқындалып, білім беру саласына қатысты маңызды міндеттер қойылды.

Тәуелсіздіктің 35 жылдығында жарияланған Жолдауда Президент келер ұрпаққа экономикасы қуатты, технологиясы дамыған, білім мен ғылымға негізделген мемлекет қалдыру қажеттігін атап өтті.

Осы мақсатта ұсынылған «Халықтық құрылыс» бастамасы аясында әлеуметтік инфрақұрылымды жаңғыртуға, жаңа білім беру нысандарын салуға және өңірлердің дамуына басымдық берілді. Бұл әр баланың тұрғылықты жеріне қарамастан сапалы білім алуына қолайлы жағдай жасаумен тікелей байланысты.

Білім беру инфрақұрылымын жетілдірумен қатар, ұстаз еңбегін жеңілдету мәселесіне де ерекше назар аударылды. Мемлекет басшысы саладағы реформалар мұғалімдерді артық есептілік пен әкімшілік жүктемеден босатуға бағытталуы тиіс екенін атап өтті. Сондай-ақ педагогтердің абырой-беделін қорғау қажеттігін айтты.

Сапалы білімнің барша балаға қолжетімді болуы тұрғысынан инклюзивті білім беру мәселесі де кеңінен қозғалды. Президент елімізде инклюзивті білім алуға тиіс 237 мыңнан астам бала бар екенін жеткізді. Осыған байланысты Үкімет пен әкімдерге тиісті инфрақұрылымды дамыту, маман тапшылығын азайту және ерекше қажеттілігі бар балалардың диагнозын ерте жастан анықтау жұмыстарын жүйелі жүргізу міндеті қойылды. Бұл іске «Қазақстан халқына» қорын белсенді тарту қажеттігі де айтылды.

Білім беру жүйесінің болашағы жаңа технологияларды тиімді пайдаланумен де тығыз байланысты. Жолдауда жасанды интеллект пен цифрландыруды дамыту, адам капиталының сапасын арттыру және өскелең ұрпақтың жан-жақты дамуына жағдай жасау мәселелеріне басымдық берілді.

Сонымен бірге Мемлекет басшысы қоғам санасын жаңғырту, «Адал азамат» құндылықтарын орнықтыру, заң мен тәртіпті құрметтеу және жауапты ұрпақ тәрбиелеудің маңызын атап өтті.

Осылайша, білім беру инфрақұрылымын дамыту, мұғалім еңбегін жеңілдету, инклюзивті білім беруді жетілдіру және жаңа технологияларды меңгеру міндеттері ел болашағына бағытталған ортақ мақсатпен сабақтастырылды.