ЖИ ЖӘНЕ ЦИФРЛЫҚ ПЛАТФОРМАЛАР: ОҚУ ТАПСЫРМАЛАРЫН ӘЗІРЛЕУДІҢ ЖАҢА МҮМКІНДІКТЕРІ

27 қазан күні «Өрлеу» БАҰО» АҚ «БҚО бойынша КДИ» филиалының курстан кейінгі қолдау жұмыстары аясында «ЖИ және цифрлық платформалар арқылы оқу тапсырмаларын әзірлеу» тақырыбында онлайн-сессия ұйымдастырылды. Шараға «Дербестендірілген оқытуға арналған цифрлық технологиялар және жасанды интеллект» біліктілікті арттыру курсының тыңдаушылары қатысты.

Онлайн-сессияны филиалдың Жаратылыстану-математикалық бағыттағы кафедрасының меңгерушісі Г.К. Өтеғұл мен аға оқытушысы А.М. Абишева өткізді. Шараның мақсаты – озық тәжірибе алмасу негізінде пән мұғалімдерінің жасанды интеллект пен цифрлық платформалар арқылы оқу тапсырмаларын модельдеу және құрастыру құзыреттілігін жетілдіру.

Сессия барысында Claude, Gemini, ChatGPT жасанды интеллект құралдары мен цифрлық платформалардың дидактикалық мүмкіндіктері қарастырылды. Қатысушылар оқу мақсатына сәйкес «Оқу мақсаты → Промпт → Тапсырма → Нұсқаулық» алгоритмі негізінде тапсырмалар құрастыру және дайын кодтар мен промпт үлгілерін өз пәнінің мазмұнына бейімдеу жолдарымен танысты.

Сондай-ақ педагогтер оқушылардың шығармашылық қабілеттерін дамытуға бағытталған интерактивті платформалардың мүмкіндіктерін талқылап, оларды сабақ үдерісіне кіріктіру жолдары бойынша тәжірибе алмасты. Онлайн-сессия курс тыңдаушыларының алған білімдерін тәжірибеде қолдануына және авторлық оқу материалдарын әзірлеуіне қолдау көрсетуге бағытталды.